LEGAZPI CITY – Pigtawan doon kan Malinao Fire Station an importansya kan pag-obserbar kan fire prevention month ngonian na bulan nin Marso.
Segun ki Malinao Fire Station Chief of Operations Senior Fire Officer 2 Jennifer Capuz sa intrevista kan Bombo Radyo Legazpi na importante an pagselebrar kaini kada taon nganing pagirumduman an namamanwaan na kalimitang nagpopoon an dry season na saro sa pinakahalangkaw na kawsa kan mga nangyayaring kasulo.
Maugma man niyang pigheras na sa laog kan enot na duwang bulan kan taon an wara pa sindang nairerehistrong kasulo sa saindang banwaan huli sa magayon nindang koordinasyon asin pagtatao nin impormasyon mapadapit sa paglikay sa kasulo sa mga komunidad.
May mga nakalatag man suboot sindang serye nin mga aktibidad para sa pagpopoon kan fire prevention month sagkod sa pagtatapos kan bulan na pwedesir balehan kan mga estudyante urog na an mga aktibidad na gigibuhon sa mga eskwelahan.
Pangapodan ni Capuz sa publiko na imantenir an kalinigan asin kaayusan sa saindang harong partikularmente na an electrical wirings, gasul, asin iba pang appliances mantang irayo sa mga kaakian an posporo asin lighter nganing malikayan an mga insidente nin kasulo.
