LEGAZPI CITY—Nagin matrayumpo asin matoninong an isinagibong enot na diplomatic engagement na inantendiran kan mga foreign ambassadors gikan sa manlaen-laeng nacion sa isla-provincia kan Catanduanes.
Segun ki Catanduanes Police Provincial Office Public Information Officer Police Major Emsol Icawat, sa intrevista kan Bombo Radyo Legazpi, bago pa man an nasabing pagbisita an nagkundusir na sinda nin mga meetings asin nag-request na man sinda nin augmentation nin VIP security personnel para sa mga nasabing ambassadors.
Maabot sa 400 na personahes gikan sa saindang ahensya an ideneploy para sa aktibidad.
Dugang ni Icawat na nagpuon an saindang familiarization visit sa lugar puon sa provincial capitol kun saen may exhibit digdi nin mga lokal na produkto, local artworks, asin iba pang displays.
Siring man na nagbisita an nasabing ambassadors sa mga piggibohan nin mga native na pagkaon, produkto nin mga abaca, asin mga pasayaran sa isla.
Mientrastanto, nakatalaan man na magbalik an mga ini ngunyan na aldaw nin Domingo, Pebrero 8, makalihis an tulong aldaw puon kan Pebrero 6 na pagbisita sa isla kun saen may kinaaraaman sa official movements, site visits, asin engagement.
