Nakaresibe nin 28 na radio challenges hali sa barko kan China an Philippine Coast Guard (PCG) asin Bureau of Fisheries and Aquatic Resources (BFAR).
Nangyari ini mantang nagsasagibo an BFAR asin PCG nin Maritime Domain Awareness (MDA) flight sa Bajo de Masinloc kan Biyernes.
Segun sa Philippine Coast Guard na nakaresibe sida nin radio challenges hali sa Peoples’ Liberation Army-Navy na barko sa parte kan 81.42 nautical miles northeast kan Bajo de Masinloc.
Nahiling man kan PCG an duwang boya na pagsadiri kan China harani sa Bajo de Masinloc asin sarong fighter jet.
Sinimbag kan PCG an nasabing radio challenges kun sain an MDA flights an uyon sa international law.
Sinierto man kan ahensya na magpapadagos sa pagsasagibo nin Maritime Domain Awareness flight ngani na masierto an seguridad kan mga parasisirang Pilipino asin para sa soberanya kan nacion.
