LEGAZPI CITY-Mahigot na sinayumahan kan Department of National Defense (DND) an pangapodan kan China na pugulan na kan Pilipinas an mga aksyon manungod sa Bajo de Masinloc.
Segun ki Defense Secretary Gilberto Teodoro, parte kan teritoryo kan Pilipinas an Bajo de Masinloc, asin an mga aksyon kan nacion susog sa internasyunal na ley, partikularmente sa United Nations Convention on the Law of the Sea (UNCLOS) asin sa 2016 Arbitral Award.
Sinabi man kan Department of National Defense na an pagsumiter kan updated nautical chart kan Pilipinas sa United Nations may katuyuhan na malinaw na maipahiling an hiwas kan maritime zones kan nacion.
Tinawang-duon kan ahensya na padagos na ipaglalaban kan Pilipinas an saiyang derichos asin soberaniya sa Bajo de Masinloc asin dae mapadara sa mga pahayag asin paghiro kan Tsina.
