Dae pa man suboot nagpapaluwas nin red notice ang International Criminal Police Organization (Interpol) laban ki dating Ako Bicol party-list Rep. Zaldy Co makalihis an labi sa sarong bulan, susog sa National Bureau of Investigation.
Enot nang sinabi kan BI na may pinadara na sindang request sa Interpol kan Nob. 23, 2025 na presenteng pig-aabangan man giraray.
Sinabi ni NBI spokesperson Atty. Palmer Mallari na nakikipagkoordinar na sinda sa law enforcement counterpart sa Portugal nganing beripikahon an mga impormasyong may kinaaraman sa kinaroroonan asin mga rekord ni Co.
Ipighahanda na man an liham sa Portugal para sa kinakaipuhang impormasyon kabale an mga records kan entry, exit ni Co sa immigration duman.
Aaramon man kan NBI kun naisyuhan nin pig-aapod na golden investor’s visa, basado sa inihayag ni DILG Secretary Jonvic Remulla na igwa si Co.
Kaiba man sa pigberepika kun may kapot na Portuguese passport si Co asin kun may nagiiral na mga record sa Portugal katakod kan anumang transaksyon sa hotel, restaurant, transportation, paggamit nin credit o debit card.
