Pinasabog kan suicide bomber an sarong explosive vest mantang piggigibo an kasal sa northwest Pakistan, na nakagadan nin pitong tawo asin naka-irido nin 25 iba pa.
Nangyari an suicide bombing sa harong kan pro-government community leader na si Noor Alam Mehsud sa Dera Ismail Khan, sarong distrito sa Khyber Pakhtunkhwa province.
Susog sa local police chief na si Adnan Khan, an mga gadan asin nalugadan dinara na sa ospital, kun saen an nagkapira nasa kritikal na kamugtakan.
Base sa salaysay kan mga nakahiling asin mga bisita, nasa tahaw sinda nin selebrasyon asin pagbayle kan magputok an bomba.
Sagkod ngonian, wara pang grupo an nag-ako kan responsibilidad sa pag-atake, alagad pigdududahan na ini an gibo kan Pakistani Taliban, na bisto man sa apod na Tehrik-e-Taliban Pakistan (TTP), na naglansar man nin kadakol na mga pag-atake sa nasyon kan mga nakaaging taon.
Nagdakula liwat an presensya kan grupo makalihis na magbalik sa poder an Afghan Taliban kan 2021, makalihis i-atras kan Estados Unidos asin an North Atlantic Treaty Organization (NATO) an saindang mga tropa sa Afghanistan makalihi nin duwang dekada nin gera.
