LEGAZPI CITY – Padagos an pigsasagibong monitoring kan Sorsogon Police Provincial Office sa mga nairerehistrong dae piglalaomang insidente katakod kan epekto kan Bagyong Ada.
Segun ki Sorsogon Police Provincial Office Spokesperson Police Major Arwin Destacamento sa intrevista kan Bombo Radyo Legazpi na kabale sa saindang nairehistro iyo an landslide kabale an nangyari sa Barangay Bariis, sa banwaan kan Matnog kun sain duwang indibidwal an gadan siring man sa pirang highway kan saindang provincia.
Nagkaigwa man sinda nin deployment nin mga kapulisan sa mga lugar na posibleng magkaigwa nin pagbabaha, pagrasay nin daga asin iba pang insidente pirang aldaw antes mamatean an epekto kan naunambitang raot nin panahon.
Dae man suboot sinda nagkulang huli ta nakipagtabangan man sinda sa mga Local Disaster Risk Reduction Management Offices sa paagi kan pag-impormar sa publiko.
Pigtaram pa kan opisyal na may mga ipig-ebakwar man sindang mga residente urog na an mga lugar na na-identipikar na permihang nagkakaigwa nin epekto an mga nag-aaging raot nin panahon.
Nakabantay man suboot sinda sa nagdadakulang numero kan mga stranded na pasahero asin behikulo sa Matnog Port huli sa ipina-otob na kanselasyon kan mga byahe.
Kahagadan ni Destacamento an kooperasyon kan publiko nganing malikayan an mga casualty tuyong nagkakaigwa nin kalamidad sa provincia kan Sorsogon.
