LEGAZPI CITY—Pigpreparar na ngunyan kan Coast Guard Bicol an saindang deployable response group sa mga station asin substations sa rehiyon katakod kan mga posibleng epekto kan bagyong Ada.
Segun ki Coast Guard District Bicol Acting Public Information Officer Ensign Paul Laurence Literal, sa intrevista kan Bombo Radyo Legazpi, naka-standby na an saindang responde group na may 86 teams o 391 personnel sa manlaen-laeng parte kan Bicol.
Siring man na preparado an saindang land and floating assets asin bukas 24 oras an saindang command center nganing magtao nin tabang sa mga namamanwaan kun kinakaipuhan.
Nagpaluwas man an ahensya nin travel advisory kun sain kanselado an mga biyahe nin lunadang pandagat sa mga provincia kan Bicol.
Sa presente, nairehistro man sa labi 1,672 na pasahero, 163 rolling cargoes, 10 vessels an stranded sa Bicol huli kan maraot na panahon.
Mienstrastanto, pagiromdom man ni Literal sa publiko na sunudon an mga orden kan mga otoridad, abiso man kaini sa mga parasisira na dae na magporbar na maglawod nganing maibitaran an anuman dae piglalaomang insidente.
