LEGAZPI CITY – Ikinaugma kan konseho kan Barangay Dap-dap, Legazpi City an kapangganahan kan saindang mga programa sa Kalinisan sa Bagong Pilipinas assessments para sa ika-apat na quarter kan taong 2025.
An naunambitang Barangay kaya an nangenot sa Halina’t Magtanim ng Prutas at Gulay program, Barangay Kalinisan Day program, asin Barangay Road Clearing Operations category na ipinaluwas kan Legazpi City Local Government Operations Office.
Segun ki Punong Barangay Glenn Barcelon sa intrevista kan Bombo Radyo Legazpi na dae sinda makapanubod na nangenot sinda sa tulong kategorya mantang maugma siya huli ta nagbunga an saindang kapagalan asin paghihingoa.
Paghistorya niya pa na pirang beses man nindang pigporbaran na kuwaon an enot na pwesto sa mga naunambitang kategorya kan taong 2024 alagad sa kamunduan suboot an dae ninda ini nakukuwa kun kaya labi an saindang kaugmahan ngonian sa pagkakaguno kan trayumpo.
Pagdoon pa kan opisyal na nagin lyabi sa saindang kapangganahan an pagtatarabangan kan mga Barangay officials, Sangguniang Kabataan Officials asin mga residente sa pagsasagibo nin mga inisyatiba asin pagmamantenir kan kalinigan sa saindang bisinidad.
Importante suboot an mga siring kaining trayumpo huli ta digdi nahihiling asin nasusukol an suporta asin partisipasyon kan saindang namamanwaan sa mga programang ipigpapa-otob kan gobierno na resulta kan pag-uswag kan turismo kan saindang lugar asin ciudad.
Naglalaom man si Barcelon na masustenir kan saindang Barangay an mga nagunong mga trayumpo asin award na saindang nakuwa kan nakaaging taon asin lalong mapa-uswag ngonian na taong 2026.
