Dae mababa sa anom na katawo an naireport na nagadan sa mahewasang pagguho nin basura sa Binaliw Landfill, mantang dose-dosena naman an iba pang nawawara.
Pigkarkulong 50 sanitation workers an natabunan kan Huwebes, Enero 8, kan nagbagsak an basura hale sa taas na pigkarkulong katumpad nin 20 palapag sa pribadong landfill na pigpapadalagan kan Prime Integrated Waste Solutions.
Presenteng nagpapadagos an operasyon kan mga otoridad kun saen naggamit an mga ini nin magagabat na makinarya, kabale an backhoes nganing hukayon an mga natabunan.
Segun ki Cebu rescuer Jo Reyes, padagos an operasyon alagad paramientras ining nagpupundo pag naghihiro an landfill.
Kinumpirmar man ni Cebu City councillor Dave Tumulak, chairman kan city disaster council, na nadugangan sa anom an kumpirmadong gadan makalihis ma-recover an duwang lawas kan Sabado, mantang 32 katawo an presenteng nawawara.
Kabale an administrative offices asin staff housing sa natabunan nin basura na pigtutubudang dakol an biktima an yaon digdi.
Nabatid na an Binaliw Landfill an nagproseso kan labi sa 1,000 tonelada nin basura kada aldaw asin nagse-serbisyo sa Cebu City asin kalapit na mga komunidad.
Bukas man an Bombo Radyo Philippines sa lado kan kumpanya alagad sagkod ngunyan an wara pa ining pahayag mapadapit sa isyu.
