LEGAZPI CITY-Pigbida kan Philippine Health Insurance Corporation (PhilHealth), na bastante an network kan mga accredited hospitals asin pasilidad kaini ngani pagserbihan an mga miembros sa bilog na nacion.
Segun kay PhilHealth spokesperson Dr. Israel Francis Pargas na haros 98% kan mga ospital sa nacion an accredited na, mantang an natatadang 2% an bako lisensyado o nagsarado na.
Presente man na pig-accredit kan PhilHealth an dai mababa sa 10,000 na pasilidad kabale an mga ospital, clinics, surgical centers, birthing facilities, HIV laboratories, asin animal bite treatment centers.
Plano man kan PhilHealth na pakusugon asin pahiwason an mga benipisyo asin mag-agi sa mga pagaadal ngani magin sustenable an mga ini.
Magiromdoman na ipinagboot kan Korte Suprema na ibalik an P60 bilyon na pondo kan PhilHealth na ibinalyo sa National Treasury, na dapat gamiton suboot susog sa Universal Health Care Act, kaiba na an pagpahiwas kan mga benepisyo para sa mga miembros.
