LEGAZPI CITY-Nakahanda suboot si Antonio Trillanes IV na magsangat nin ethics complaint laban kay Sen. Ronald ‘Bato’ Dela Rosa kun dai kaini gagampanan an saiyang obligasyon sa pagpopoon kan masunod na sesyon kan Kongreso.
Segun kay Trillanes, isasangat niya an reklamo kun dai maatendir an senador sa mga sesyon kan Senado, makalihis an adjournment kan halangkaw na kapulungan sa enot na regular session kaini sa Hunyo.
Boot sabihon, kun mabalik liwat an sesyon sa bulan nin Hulyo, asin dai pa magpahiling an dating Philippine National Police chief, isasangat suboot an opisyal na kaso.
Nanindugan man an dating kongresista na an regular attendance sarong pangenot na responsibilidad kan sarong naelihir na senador asin an padagos na pagliban an malinaw na sarong pagbayolar.
Kun dai suboot naisasagibo kan sarong senador an saiyang obligasyon na magatendir sa mga sesyon, saro ining ‘dereliction of duty’ na pwedisir magin basehan ngani makapagsangat nin ethics complaint.
Nagpoon na mag-absent si Dela Rosa kan ikaduwang semana kan Nobiyembre makalihis an Undas break kan Senado.
Bago pa ini, mahihiling an dating 4-star general na nagtatabang sa mga biktima kan makusog na pagyugo sa probinsiya kan Cebu.
