LEGAZPI CITY- Naka alerto na an lokal na gobierno kan banwaan kan Daraga para sa pigkakahaditan na aktibidad kan bulkang Mayon.
Segun ki Daraga Public Information Officer Renz Luna sa intrevista kan Bombo Radyo Legazpi na tinawan na nin direktiba ni Mayor Vic Perete an mga ahensya de gobierno sa banwaan na enkasong maglangkaw pa an aktibidad kan bulkan, posibleng suspendiron na an operasyon kan mga tourist destinations asin pinaghahanda man sa posibleng pag-ebakwar kan mga residenteng nasa Mayon unit area.
Partikular na pigbabanyan an mga turista na pigtatangkilik an ATV rides asin mahigot na pinagirumduman na ibitaran an paglaog sa 6km radius permanent danger zone.
Dugang pa kan opisyal na saro sa mga pigkokunsiderar enkasong magkaigwa nin aktibidad an bulkang Mayon iyo an mga paraoma na nasa pamitisan kan bulkan an kabuhayan.
Sa ibong kaini, sinabi ni Luna na warang dapat ikahadit an mga residente kan banwaan huli ta preparado man an lokal na gobierno sa anuman na sitwasyon asin kalamidad.
