LEGAZPI CITY – Nagtetenir na non-passable o dae maagihan an nagkapirang kakalsadahan makalihis an mga serye nin landslide asin pagbabaha sa provincia kan Catanduanes huli sa mga pag-uuran na dara ni Bagyong Wilma na sinabayan pa kan shearline.
Segun ki Catanduanes Provincial Disaster Risk Reduction and Management Office Emergency Operations Chief Roberto Monterola sa intrevista kan Bombo Radyo Legazpi na basado sa saindang latest report an may mga tinampo nang naagihan sa presente alagad one lane sana an nagagamit.
Sa kagayunan suboot an wara sindang nairehistrong casualty sa mga epekto kan mga naunambitang raot nin panahon sa ibong kan haros gabos na saindang mga banwaan an apektado.
Nagigin pahirapan man an clearing opeartion partikulamente na sa mga lugar na nagkaigwa nin landslide asin mudslide huli sa takot na may magrasay na mga darakulang tipak nin gapo.
Piglalaoman man kan opisyal na matatapos na ngonian na aldaw an mga wala-toong clearing operations sa mga apektadong kakalsadahan sa saindang provincia urog nang padiit-diit nang nagmamarhay an kamugtakan nin panahon.
Pagirumdom ni Monterola sa mga ma-baybay sa mga tinampong parte kan saindang provincia na mag-ingat sa pagbyahe asin magin rigmat mapadapit sa posibilidad kan pagrasay liwat kan daga asin iba pang lkatakod na insidente ngonian tag-uran.
