Nagpatanid an Bureau of Customs na posibleng raoton an pirang luxury vehicles na pagsadiri kan mga kontraktor na sinda Pacifico asin Sarah Discaya kun wara man giraray na mabakal sa auction sa Disyembre 5, 2025.
Kabale an mga Discaya sa mga pig-imbestigaran katakod kan suboot anomalya sa mga flood control projects kan gobierno.
Nabatid na an mga behikulong ipapa-auction an 2023 Rolls-Royce Cullinan, 2022 Bentley Bentayga, 2022 Toyota Tundra, asin 2023 Toyota Sequoia.
Segun ki BOC Deputy Chief of Staff Chris Bendijo, pwedesir man giraray isairarom an mga behikulo sa condemnation o pagraot kun wara talagang malaog na bidders.
Siring man mas mawot kan BOC na ma-convert an mga ini sa revenue orog na kaipuhan kan nacion nin dugang na pondo.
Dakula an ibinaba kan minimum bid price para sa ikaduwang auction kun saen haros P10 million an binawas sa Rolls-Royce gikan sa dating P45.3 million.
Ibinaba na man an auction price kan Toyota Tundra sa P1.5 million, Toyota Sequoia (P2.6 million) asin Bentley Bentayga (P3.2 million).
Naghihingoa an BOC na an mas hababang presyo an makaka-engganyar nin mas dakol na bidders para sa mas magayon na bidding.
Kun magpalyar liwat an auction, pwedesir nang magtanggap an BOC nin direct offers, kun saen an presyo an gikan mismo sa buyer. Alagad, may kapangyarihan man giraray an BOC commissioner na sayumahan o tanggapon an anumang pig-ofresir.
Mientrastanto, inireport ni Bendijo na an Bureau of Internal Revenue an nagluwas na nin notice of restraint and levy sa iba pang natatadang behikulo kan mga Discaya asin nakikipagkoordinar na an duwang ahensya para sa turnover kan 17 pang units na nasa kustodiya kan BOC.
