LEGAZPI CITY-Dismayado si Manila City Mayor Isko Moreno sa pag-vandalize giraray sa nagkapirang mga pampublikong lugar sa ciudad kan Maynila.
Kasunod ini kan isinagibong rally kan Nobyembre 30 kun sain nagsagibo an mga ralyista nin programa sa Luneta asin nagmartsa pasiring sa Mendiola.
Mantang nagmamartsa an nagkapirang ralyista, minamarkahan ninda an nagkapirang public structures na sindang inagihan siring kan tulay asin sa mga kakalsadahan.
Naggamit man an nagkapirang protestante nin mga spray paint.
Sinabi kan alkalde, na an mga protestante an nagpoprotesta para sa tamang paggamit kan pondo, alagad sinda mismo an dahilan kan pag-aaksaya sa nasambitang mga pondo.
Dagdag pa niya na an mga kwartang dapat napapaduman sa serbisyo publiko an nagigin parte kan paglilinig sa mga kalat asin mga vandalized public structures sa ciudad.
Ipigsugo man kan alkalde an paglilinig sa mga lugar kun sain nangyari an mga protesta.
Kasabay man sa direktiba an paghale sa mga nawalat na tarpaulin, effigy, asin iba pang bagay siring man an mga imprastrakturang sinuratan kan mga ralyista.
