Kinumpirmar ni Agriculture Secretary Francisco Tiu Laurel Jr. naghahanda siya nin kasong cyber libel laban kay dating Ako Bicol Rep. Zaldy Co, makalihis an serye nin video posts kan dating kongresista na nagdadawit ki First Lady Liza Araneta-Marcos sa su suboot anomalya sa importasyon asin distribusyon kan mga produktong agrikultural.
Pinahimutikan ni Tiu Laurel an alegasyon na siya an nakiaram nganing ipapundo an mga naenot na imbestigasyon sa bagas asin sibulyas makalihis mabanggit an pangaran kan first lady.
Inapod pa niya si Co na “utikon” asin iniladawan an mga akusasyon bilang “fabricated lie” asin “total baloney.”
Magigoromdomang si Co an nagbutas bilang representante kan Ako Bicol Party-list asin nagluwas nin mga video kun saen inakusaran niya an First Family nin pakikiaram sa mga congressional inquiries mapadapit sa 2022 onion price crisis asin 2024 rice price inquiry.
Kabale sa saiyang binanggit ang pagbaba kan taripa sa imported rice na suboot dae nakapagpababa kan presyo sa merkado.
Pagdoon ni Tiu Laurel, dakol na sektor an nagsuhestyon nin adjustment asin bako totoo na si Co sana an nagtao nin rekomendasyon.
Sa lado kan Malacañang, mismong si Presidente Ferdinand Marcos Jr. an nangapodan ki Co na magbalik sa nacion nganing hampangon an saiyang mga alegasyon, na inapod kan Presidente asin kan saiyang pamilya na “kautikan.”
