Nangapudan si House Speaker Faustino “Bojie” Dy III ki dating Ako Bicol Rep. Zaldy Co na bumalik na sa nasyon asin personal na hampangon an kasong isinangat kontra saiya, makalihis na magpaluwas sana ini nin mga pahayag sa paagi nin video hali sa ibang nacion.
Segun ki Dy, saro sa enot niyang lakdang bilang bagong Speaker iyo an kanselaron an travel authority ni Co ngani na mapiritan ining magbalik sa Pilipinas.
Huli ta sagkod ngonian dae pa nakauli an dating congressman, nakipag-olay suboot sinda sa Department of Justice nganing maparikas an pagkanselar kan saiyang pasaporte.
Sinambit man kan Speaker na an gabos na iba pang mga kongresista na hinagad na magsumiter nin paliwanag nagkooperar asin nag-atubang sa imbestigasyon kan ICI, apwera ki Co na “naglikay” asin suboot orog pang “naribong” an publiko sa saiyang mga video.
Nanindugan si Dy na kulang an pagpaluwas nin pahayag hale sa ibang nacion.
Sinabi niya na dapat mag-atubang si Co, magsumpa, asin magpresentar nin ebidensya sa ICI.
Pigsierto kaini na preparado an Kamara na makipagkoordinar sa mga magkakanigong ahensya ngani na maseguro an kaligtasan ni Co enkaso magtao ini nin testimonya.
