LEGAZPI CITY—Pighayag kan Provincial Disaster Risk Reduction and Management Office (PDRRMO) Sorsogon na dae man suboot totally na nag-agi sa landmass kan Gubat, Sorsogon an bagyong Ramil.
Segun ki PDRRMO Sorsogon Engr. Raden Dimaano, sa intrevista kan Bombo Radyo Legazpi, dae man naka-eksperyenysa nin labing pag-uuran asin paros sa oras kan pigsasabing landfall, asin sa presente an nagpundo na man suboot an maluluyang pag-uuran sa lugar.
Alagad, naka-eksperyensya suboot nin makukusog na pag-uuran sa banwaan kan Sta. Magdalena, Matnog, asin Bulusan.
Segun ki Dimaano na kun sinda an hahapoton an sa coastal waters suboot kan lugar nag-agi an bagyo.
Dae na man suboot sinda nagpa-ebakwar nin mga residente huli sa hibaba an saindang nahiling na rainfall, alagad, mantenido man na alerto an saindang opisina para sa mga posibleng updates nganing maipaaram tulos ini sa komunidad.
Wara man suboot sindang nairehistrong labing pagbaha sa saindang lugar huli sa bagyo.
Abiso man kan opisyal sa namamanwaan na imantenir an koordinasyon sa saindang ahensya mapadapit sa iba pang impormasyon asin magsunod sa mga pigsusugo kan mga opisyales kan gobierno para sa saindang kaligtasan.
