LEGAZPI CITY – Nanindugan an mga residentes kan Barangay Namantao, Daraga, Albay na dapat ipagpadagos an mga napunan nang road reblocking operations partikulamente na sa saindang lugar.
Ini an kasunod kan pagsuspendir ni Department of Public Works and Highways (DPWH) Secretary Vince Dizon sa gabos na road reblocking operations sa enterong nacion makalihis madiskubre an suboot maanomalyang proyekto sa Bulacan asin Cagayan.
Segun ki alyas “Julius” sa intrevista kan Bombo Radyo Legazpi na dapat tapuson na an haloy nang napunan huli ta kadaklan sa saindang mga kakalsadahan an parte kan maharlika highway na nagtataong pahirap sa mga motorista.
Pagdoon niya man na haros puru-pundo an ginibong reblocking sa saindang lugar huli ta pinunan ini kan nakaaging bulan pa nin pebrero asin ngonian an dae pa tapos maski sarong kilometro sana an halaba kan tinampo.
Pagbuyagyag niya pa na an mga binungkal na mga kakalsadahan sa saindang barangay an mga nasa maray pang kamugtakan asin pigplano sana suboot na rauton nganing makataong kaulangan sa mga byahero asin motorista.
Pigtaram pa ni Julius na nagkakaigwa nin korapsyon sa mga siring kaining proyekto kan gobierno huli ta maski an mga maray man na mga parte kan tinampo an bubungkalon nganing magkaigwa sana suboot nin ganansya an mga contractor.
