LEGAZPI CITY—Napa-ebakwar na an mga na-stranded na pasahero sa Pio Duran port sa banwaan kan Pio Duran, Albay huli sa posibleng epekto kan bagyong Opong sa provincia.
Segun ki Municipal Disaster Risk Reduction and Management Office Head Pio Duran Noel Ordoña, sa intrevista kan Bombo Radyo Legazpi, may nakadesignar na evacuation center sa mga na-stranded na nakatalaang magbiyahe kuta pasiring sa isla provincia kan Masbate.
Sa presente, na-ebakwar na man an mga residentes gikan sa manlaen-laeng barangay kan nasabing banwaan siring man an mga pasyente kan Pio Duran Memorial Hospital.
Nakaresibe naman suboot nin mga asistensya an mga apektadong residentes gikan sa Department of Social Welfare and Development (DSWD).
Padagos man na naka-alerto an lokal na gobierno kan Pio Duran sa pakikipagtabangan sa mga kapulisan, Philippine Army, Philippine Maritime Command, Bureau of Fire Protection, Philippine Coast Guard, non-governmental organization, asin iba pa nganing makapagresponde sa saindang namamanwaan.
