LEGAZPI CITY—Piglalaomang mangrarapado sa haros kadaklan na parte kan rehiyong Bicol an Bagyong Opong, basado sa latest tracking kan state weather bureau.
Segun ki Weather Specialist Melvin Almojela, sa intrevista kan Bombo Radyo Legazpi, posibleng mag-landfall an bagyo sa may ibabang parte kan provincia kan Catanduanes, sa parte kan provincia kan Albay asin Camarines Sur, o sa may parte kan banwaan kan Tiwi o harani sa isla kan Rapu-Rapu sa Albay.
Piglalaomang matama an bagyo sa Biyernes nin aga, Setyembre 26 asin posibleng mag-abot sa typhoon category mantang nagrarani sa kadagaan kan nacion.
Dugang kan opisyal na posibleng mamatean an epekto kan bagyong Opong puon saagang hapon, Setyembre 25, antes sa Sabadong aga, Setyembre 27.
Posible man na maeeksperyensyahan an nasa 100-200 millimeter na pag-uuran sa bilog na Bicol puon saagang hapon sagkod Biyernes nin pagkahapon.
Segun ki Almojela mangrarapado an bagyo bandang mga alas-7 o alas-8 nin pagkaaga sagkod alas-10 nin pagkaaga sa Biyernes.
Piglalaoman man na magdadara an bagyo nin makukusog na pag-uran asin pagbugso nin paros na pwedesir magkawsa nin pagbabaha asin pagrasay nin daga partikularmente na sa mga landslide and flood-prone areas.
Mientrastanto, basado sa latest bulletin kan state weather bureau ngunyan na alas-5 nin pagkahapon, Setyembre 24, nakabandera na an Tropical Cyclone Wind Signal no. 2 sa Northern Samar asin northern portion kan Eastern Samar (San Policarpo, Oras, Jipapad, Arteche) mantang Signal no. 1 sa Catanduanes, Camarines Sur, Albay, Sorsogon, Masbate, Samar, natatadang parte kan Eastern Samar, Biliran, asin northern portion kan Leyte (Barugo, San Miguel, Babatngon, Tacloban City, Calubian, Leyte, Capoocan, Carigara, Palo).
Basado man sa ahensya na maluwas kan Philippine Area of Responsibility an bagyo sa Sabado nin pagkahapon.
