LEGAZPI CITY-Tinawan doon ni Department of Public Works and Highways (DPWH) Sec. Vince Dizon na pigsugo ni President Ferdinand Marcos Jr. na ubuson an gabos na mga imbuelto sa kurapsyon sa nacion sa tahaw kan mahewasang hiro protesta sa Edsa Shrine asin sa Luneta Park.
Segun kay Dizon na dai mapundo an ahensiya hasta dai naipapaotob an direktiba kan Presidente laban sa katiwalian katakaod kan mga flood control project.
Nagpoon an mga protesta sa isyu kan maanomalyang flood control projects kun sain imbuelto an suboot mga tiwaling DPWH official, mga kontratista asin mismong mga mambabatas.
Ipighayag pa ni Dizon na tulos nang nagsasagibo nin aksyon an DPWH kasunod kan direktiba kan Presidente, kun sain nagsangat na nin tulong kaso sa Ombudsman sa 26 na mga indibidwal, siring man an pagka-dismiss kan 3 opisyal, mantang nasa 17 an nasuspendir asin nakatakdang masibak sa serbisyo sa mga masunod na aldaw.
Magigirumduman na ipigbusol kan Presidente an Independent Commission for Infrastructure (ICI) ngani mabusisi nin maray an mga anomalya sa flood control asin iba pang infrastructure projects ngani malabanan an korapsyon.
Mientrastanto, nasa 210 grupo an nakisaro sa “Trillion Peso March” sa EDSA Shrine kairiba na an mga unibersidad, mga jovenes, civil society, asin an mga simbahan.
Basado man sa Manila DRRMO, labi 49,000 na katawo an nakisaro sa Luneta Park para sa pag-protesta laban sa katiwalian
