LEGAZPI CITY – Ipigdoon kan sarong propesor na magpakarhay an mga opisyal kan gobierno sa mga pigsasagibong imbestigasyon manungod sa mga katiwalian sa flood control projects.
Segun ki University of the Philippines College of Mass Media and Communication Professor Danilo Arao sa intrevista kan Bombo Radyo Legazpi na dae pwedesir na basulon an taumbayan kun nahihiling ninda na nagigin palabas na sana an mga hearing na nagmimistulang nagdadalagan an mga ini sa pagka-best actor o pagka-best actress.
Bako pa suboot late para sa ibang senador na magtuga na kun imbwelto talaga sinda o dae sa mga anomalya huli ta padiit-diit nang nagruruluwasan an mga ebidensya kan mga bagay na dati nindang pigninigaran.
Suhestyon niya man na magresign na sana an mga imbweltong pulitiko nganing mahiling man kuta kan publiko na halangkaw an standard kaini pag-abot sa governance and accountability.
Pigtaram pa kan naunambitang propesor na nakakatabang an role kan media sa pag-cover kan mga hiro protesta kan publiko nganing mahubog an kamalayan kan publiko asin nganing maaraman ninda kun sinda an tugot o bako tugot sa mga nangyayaring paghiro kan taumbayan.
Kadaklan suboot sa mga media organization sa presenteng panahon an dae na natatakot sa pagsisiwalat kan tunay na mga nangyayari maski kagsadiri pa ini kan sarong tawo na harani sa presenteng administrasyon.
Dae man siya makikigkig kun maaraman niya na may mga mangyayaring hiro protesta sa manlain-laing parte kan nacion sa mga masunod na aldaw partikulamente na sa anibersaryo kan pagdeklara kan Martial Law.
Pighayag pa ni Arao na may rason nganing madagit an publiko sa mga nangyayaring paghabon sa kaban kan nacion asin may rason nganing magsagibo nin hiro protesta bako sana sa pagkondena kundi paghagad nin paninimbagan sa mga imbweltong opisyal kan gobierno.
