LEGAZPI CITY-Naka-heightened alert an National Capital Region Police Office (NCRPO) para sa mga piglalaomang hiro-portesta ngonian na domingo kasunod kan padagos na pagorolay sa kongreso sa mga anomalyang mga flood control projects sa nacion.
Kinumpirma man kay NCRPO Spokesperson Police Major Hazel Asilo na apat pa an saindang pigmomonitor na mga programa na siyang nakatakdang iaksa sa nagkapirang parte kan Maynila magin sa EDSA.
Pigsisierto man ni Asilo na magin handa an saindang tropa para sa mga programang ini ngani masierto na magigin matoninong, ligtas asin dai makaulang sa publiko asin sa trapiko an mga protestang pigsasagibo kan mga progresibong grupo sa mga masunod na aldaw.
Padagos man na pigpapaotob kan ahensya an maximum tolerance maski pa warang permit an nagkapirang grupo na nagsasagibo kan saindang mga programa.
Bilang respeto suboot sa mga kapulisan an direchos man kan taumbayan an makapagpadara kan saindang mga opinyon asin mga mwot sabihon sa gobierno.
Tatawanan man suboot an mga reliyista nin sarong ora spara matapos an saindang mga programa orog na dai suboot mai-agi sa matoninong na orolay an saindang grupo.
Mientrastanto, duwa man sa apat na grupong nakatalagang maghiro-protesta an presenteng nakakuwa na nin permit mantang padagos na pigaaram kun igwa pang ibang grupo na balak magbale sa mga protesta.
