LEGAZPI CITY—Ikinaogma kan sarong mixed martial arts fighter na tubong Daraga, Albay na tinawan siya nin tsansa na irepresentar an Pilipinas para sa saiyang international debut sa China.
Gigibohon an nasabing laban sa Zhengzhou, China sa Setyembre 19, 2025.
Segun ki Ian Paul Lora kan Lions Den MMA, sa intrevista kan Bombo Radyo Legazpi, ini an enot niyang international na laban kontra sa sarong fighter na miyembro kan BRAVE Combat Federation.
Mas pinaghandaan suboot niya an training huli ta aram niyang makukusog man an saiyang mga makakalaban.
Mensahe man ni Lora sa mga joven na mawot maglaog sa siring na sport na magpadagos sana sa saindang mga training nganing makua an saindang trayumpo.
Padagos man an saindang paghagad nin suporta sa gobierno na matawan nin tabang pinansyal nganing mas magin preparado para sa saindang napaparaning laban.
Dugang ni Lora na sisikapon niyang maiuli an kampeonato para man sa karangalan kan Pilipinas.
