LEGAZPI CITY-Wara pang desisyon an Land Transportation Franchising and Regulatory Board (LTFRB) sa hirit na P1 na taas pamasahe kan mga transport group.
Sa presente, nagsasagibo pa nin pagdinig an ahensiya para sa nationwide fare adjustment na ipigsangat kan mga grupo, kairiba an Pangkalahatang Sanggunian Manila and Suburbs Drivers Association Nationwide (Pasang Masda), Alliance of Transport Operators and Drivers’ Association of the Philippines, asin an Alliance of Concerned Transport Organization.
Segun kay Atty. Veronica Soriano an abogado kan mga petitioner na huring natawanan nin paghalangkaw sa pamasahe an mga grupo kan Oktubre 2023.
Nagkulang man suboot an fuel subsidy na ipigtao kan gobierno, alagad padagos an paghalangkaw kan mga petrolyo asin mga operational asin maintenance expenses.
Sinabi man ni LTFRB Chairman Atty. Teofilo Guadiz III, na dapat magkaigwa nin solidong pag-aadal an grupo mapadapit sa alegasyon na kulang an fuel subsidy program kan gobyerno.
Huli digdi nagpaapod nin miting an saindang tanggapan asin magpapaluwas nin resolusyon kun aaprubahan o ibabasura an hirit na taas pamasahe sa mga transport group.
