LEGAZPI CITY—Posibleng magdurar sagkod sa bulan nin Enero sa masunod na taon an pigsasagibong road reblocking sa parte kan Barangay Bigaa, Legazpi City.
Segun ki Barangay Bigaa, Legazpi City Kapitan Koko Arienda, sa intrevista kan Bombo Radyo Legazpi, basado sa saindang miting kaiba an in-charge na engineer kan Department of Public Works and Highways asin contractor na kun aabuton nin mga pag-uuran posibleng matatapos an road reblocking sa Enero 2026.
Dugang ni Arienda na an gabos na light vehicles na gikan sa primer distrito kan Albay an paramientras na maagi sa Barangay Buyoan pasiring sa Barangay Matanag, Barangay Dita, Barangay San Joaquin asin Barangay Rawis.
Pwedesir man na mag-agi sa rutang Barangay Buyoan, pasiring sa Barangay Matanag, Barangay Bonga, Barangay Pawa asin pasiring sa Barangay Bogtong.
Siring man sa Barangay Buyoan, pasiring sa Barangay Matanag, Barangay Bonga, Barangay Pawa, Barangay Tamaoyan asin pasiring sa Barangay Rawis.
Mientrastanto, abiso man ni Arienda sa mga motorista na pasiring sa Legazpi City o primer distrito kan Albay na yaon an saindang opisina nganing magtaong asistensya; siring man an saindang paghagad nin respeto asin pasensya huli sa nasabing road reblocking.
