Sinuspendir kan Land Transportation Office an lisensya kan sarong rider sa laog nin 90 aldaw makalihis na mag-viral an video kaini na nagbabayle mantang nakatindog sa ibabaw kan sarong motorsiklo sa tahaw kan trapiko sa Manila.
Nagpaluwas na nin show cause order an LTO laban sa rider asin kagsadiri kan motorsiklo.
Pigsugo kan ahensya an rider na magpaliwanag asin mag-atubang sa sarong hearing sa Agosto 20.
Pigpapasuko man an saiyang lisensya.
An drayber pwede man hampangon an pinakamagabat na penalidad—an pagbawi kan saiyang driver’s license—kun mapatunayan na bako karapat-dapat na magmaneho.
Kasabay kaini, nagpagirumdom man an LTO sa publiko na an tinampo bakong lugar para sa “showing off” asin dapat pirming enoton an kaligtasan.
