LEGAZPI CITY – Nakipag-olay si House Speaker Martin Romualdez sa mga bicolano lawmakers o Bicol Bloc sa 20th Congress.
Segun ki Ako Bicol Partylist Representative Alfredo Garbin Jr. sa intrevista kan Bombo Radyo Legazpi na nag-durar an pag-oolay nin sarong oras asin natukar an mga prayoridad na programa asin proyekto sa rehiyon.
Saro sa saindang ipigdulok sa House Speaker iyo an South Long Haul o an pigbubusol nindang inter-city rail line project sa poon Metro Manila sagkod sa Matnog, Sorsogon asin gabos sinda nagpahayag nin sentimyento dapit digdi.
Nakumbinse ninda an leder kan kamara de representantes asin nagpromesa sainda na kaka-olayon niya si Department of Transportation Secretary Vince Dizon nganing maisakatupadan an nasabing plano.
Pigtaram pa kan opisyal na pigtukar man sa pag-orolay an extension kan expressway kun sain kamawotan ninda na mai-antos ini sa rehiyon na parehong madara nin marikas asin salbadong byahe na matabang man sa pagpapa-uswag kan ekonomiya kan Bicol.
Pagdoon niya man na pupundohan na kuta an proyekto kan Bank of China kan nakaaging administrasyon alagad nakansela ini kan mag-asumir na sa pwesto si Presidente Ferdinand Marcos Jr.
Paninidugan niya man na dae pwedeng pasiring sana sa norte an mga magagayon asin mauswag na mga proyekto kundi napapanahon na man na darahon man ini pasiring sa katimogang parte kan luzon.
Pagsyerto man ni Rep. Garbin na dapat hilingon an magayon benipisyong pigkakawsa kan mga proyekto na nagpapasiring sa rehiyon kun sain sa kada aagihan kaini an napaparani an lugar sa sarong mauswag na negosyo.
