Bako apektado an Palasyo sa nagluwas na survey kun saen nangengenot suboot si Vice President Sara Duterte sa mga posibleng kandidato sa pagkapresidente sa 2028.
Basado sa resulta kan survey wara sa mga nangengenot na pangaran an kaalyado ni Presidente Ferdinand Marcos Jr.
Segun ki Palace Press Officer Claire Castro, patunay sana ini na naka-concentrate an Presidente sa pagtatrabaho asin dae namumulitika.
Pagdoon ni Castro, harayo pa an eleksyon asin mas pigtawan nin atensyon ngunyan kan administrasyon an pagpapaotob kan mga proyekto asin programa nganing masimbagan an pangangaipuhan kan publiko asin mapauswag an nacion.
