LEGAZPI CITY-Binisto kan Legazpi Philippine National Police (PNP)
an 2 personnel kan PNP huli sa pagresponde sa sarong aki na nalunod sa Barangay Lamba.
Segun kay Police Executive Master Sergeant Carlos Paña, sa intrevista kan Bombo Radyo Legazpi, na nakaabot saindang ofisina an tabang kan saindang 2 personnel kairiba an Bureau of Fire Protection sa pagresponde sa sarong aki na nalunod.
Dagdag pa kan opisyal na binisto an duwang PNP personnel na sinda Police Corporal Joseph Boragay asin Police Master Sergeant Carlo Irlain, na nagtabang sa pagresponde asin pagahanap nin sasakyan ngani maidara sa ospital an aki para sa asistensiyang pang-medikal.
Nanotaran kan polisya an insidente huli sa tabang kan mga opisyal kan barangay.
Sa presente, segun sa opisyal na nasa maayos kondisyon na an aki.
Laoman man na matatawanan nin honra an mga pulis na nagresponde sa insidente.
Ngonian sana suboot nagkaigwa nin siring kaini na kritikal na sitwasyon an polisya na magseserbing patanid sa iba pang pulis na magresponde orog na nagkapira sa mga pulis an kadikit sana an napag-adalan pagabot sa medikal alagad an iba nagradwar man sa kursong nursing.
Nagsabi man an opisyal na kaipuhan magkaigwa nin training an PNP orog na ngonian na panahon na nagkakaigwa nin mga rescue operation asin dakulang bagay an pagresponde kan mga kapulisan sa mga nangangaipohan.
Nagpagirumdom man an opisyal mapadapit sa mga lugar na delikado asin bantayan an mga kaakian, na dapat dai ipagkatiwala sa kapwa aki, ngani maibitaran an mga siring kaining kritikal na sitwasyon.
