LEGAZPI CITY-Ipinaluwas na kan Department of Budget and Management (DBM) an kabilugang P1.625 bilyon para sa replenishment kan Quick response funds (QRFs) kan mga ahensiya kan gobierno.
Gagamiton an P625 milyon para sa pagbakal kan Family Food Packs asin non-food items kan Department of Social Welfare and Development (DSWD) para sa labi asin kabangang milyong pamilya na apektado kan mga kalamidad.
Mientrastanto, ipapanao na man an kabilogang P1 bilyon sa Department of Public Works and Highways (DPWH) ngani masakop an ikaduwang replenishment kan saindang Quick response funds (QRFs).
Segun kay Budget Secretary Amenah Pangandaman, na nasasabutan ninda kung gano kaimportante para sa mga ahensiya an bastanteng pondo ngani makapagresponde asin makatao nin tabang sa mga nangangaipohan, na magigin kumpleto sa oras na maisumiter na an mga dokumento.
Sa datos kan National Disaster Risk Reduction and Management Council (NDRRMC), nagabot na sa 3.84 milyon na indibidwal o nasa 1.06 milyong pamilya an naapektaran kan magagabat na paguran asin pagbaha sa nacion.
