LEGAZPI CITY – Ikina-ugma kan mga otoridad sa Pioduran, Albay an pag-gayon kan panahon makalihis an pirang aldaw na pag-uuran na dara kan mga bagyo asin habagat.
Segun ki Pioduran Municipal Disaster Risk Reduction and Management Office Head Noel Ordoña sa intrevista kan Bombo Radyo Legazpi na ginamit ninda ini bilang dakulang oportunidad nganing magsagibo nin clean-up drive sa enterong banwaan makalihis na mag subside an mga pagbabaha.
Partikular na piglinigan ninda an mga baybayon asin coastal areas kun sain tambak an mga agricultural waste na inanod sa saindang kadagatan arug kan bonot asin nagkagarabot na mga pananom na posibleng hale sa mga kabuludad.
Afuera kaini an padagos man an saindang pagbabarewas nin ayuda sa mga naapektarang mga sektor arug na sana kan mga parasisira, fish processor, asin mga paratienda makalihis an pirang semanang warang kabuhayan huli sa epekto kan mga raot nin panahon.
Pigtaram pa kan opisyal na may mga politiko na man suboot an nagpasiring sa saindang banwaan na nagpa-abot nin tabang asistensya arug kan foodpacks, dugang na personel, mga equipment asin iba pa.
Sa presente an natapos na man an saindang decampment sa mga evacues makalihis an isinagibong assessment partikular na sa mga binahang barangay mantang dae pa man muna ninda tinugutan magbalik an mga pasyente sa sarong binahang hospital huli sa nagtatagdong bubong.
Nagkaigwa na man nin byahe nin roro sa Pioduran Port pasiring sa Masbate alagad pigkokompirmar pa ninda kun ligtas na magbyahe pasiring man sa Burias Island.
Pagdoon pa ni Ordoña na maski nagmarhay na an panahon sa saindang lugar an mantinidong pigbabawal an paglalawod kan mga saradit na sakayang pandagat huli ta nagtetenir pa mang delikado para sa sainda an mga ukol sa kadagatan.
