LEGAZPI CITY – Arestado an sarong lalaki makalihis ma-aktuhang nanghahabon nin niyog sa laog kan sarong pribadong compound sa Barangay Cruzada, Oas, Albay.
Segun ki Oas Municipal Police Station Chief of Police Police Major Nathaniel Jacob sa intrevista kan Bombo Radyo Legazpi na binisto an suspetsado na si alyas “ben”, 22 anyos, soltero, laborer asin residente kan nasambitang barangay.
Susog sa saindang imbestigasyon an napag-araman na naisturyahan kan sarong kapitbahay an aki kan kagsadiri kan mga niyog na may nanghahabon sa saindang tanom na tulos man kaining isinumbong sa saiyang ama.
Kan magpasiring suboot an mag-ama sa lugar kaiba an mga barangay official an naaktuhan na yaon pa sa taas kan niyog an suspetsado asin nasa baba man an 9 na pidasong niyog na nahabon na kaini.
Pigtaram pa kan opisyal na dae na man nagtugot an kagsadiri na i-settle huli ta maski aki pa sana suboot an suspetsado an imbwelto na ini sa mga serye nin panghahabon sa lugar.
Posible suboot na warang kwarta an suspetsado kun kaya naisipan kaining habunon an niyog kan biktima huli man sa halangkaw na presyuhan kaini ngonian sa mga merkado.
Sa presente an nailipat na an suspetsado sa kustodiya kan Oas MPS para sa magkakanigong disposisyon asin mahahampang ini sa kasong qualified theft na may nakatalaang pyansa na tres mil de pesos para sa temporamenteng libertad.
Pagirumdom ni Jacob sa publiko na proteksyonan an sadiri asin saindang mga property nganing malikayan na mabiktima kan mga parahabaon asin iba pang elemento.
