LEGAZPI CITY-Inanunsyo kan Brave 1, sarong state-backed defense investment na grupo kan Ukraine, na tutugutan na ninda an mga foreign arms companies na probaran an saindang pinakabagong teknolohiya sa mismong front line kan gera kontra sa Russia sa irarom kan programang ”Test in Ukraine.”
Sa nasabing scheme, magpapadara nin armas an mga kumpanya sa Ukraine, magtatao nin online training, asin hahalaton an feedback hale sa mga militar na aktwal na gagamiton ang mga ini sa labanan.
Segun kay Artem Moroz, head of investor relations kan Brave1, dakula an interes sa programa, alagad dai pa siya nagtataram sa partikular na kumpanyang kaiiriba o mga detalyes mapadapit sa posibleng gastos.
Obheto man kan programa na makaskas an pagaram kan epektibong teknolohiya sa gera sa Russia, mantang pigtatabanagan an mga dayuhang kumpanya na mahiling kung arin sa saindang produkto an tunay na nagagana sa aktwal na combat conditions.
Kabali sa mga prayoridad kan Ukraine para sa pag-eksamin iyo an mga advanced na sistema nin air defense system arog kan mga drone interceptors, AI-guided weapons, gliding bombs, unmanned water systems, electronic warfare tools, asin advanced fire control systems para sa mas eksaktong artillery.
Naglalaom an Kyiv na makagibo nin mas matibay na industriya nin depensa, sa tabang kan mga dayuhan na liderato, ngani mapugulan an mas makusog na mga pwersa kan kaiwal.
