LEGAZPI CITY – Nagsuspendi na nin klase sa Pioduran, Albay huli sa warang patod na pag-uuran na dara ni bagyong Crising na nagpapadifisil man sa saindang transportasyon na habal-habal.
Alagad paglinaw ni Pio Duran Municipal Disaster Risk Reduction and Management Office head Noel Ordoña sa intrevista kan Bombo Radyo Legazpi na an mga klase sa elementary sagkod high school sana an suspendido huli ta an ibang mga college student an hararani sa saindang mga eskwelahan.
Nagtao na man ini nin kasuguan sa mga Barangay Disaster Risk Reduction and Management na reparuhon an mga estudyante na yaon sa eskwelahan kan ipaluwas an suspensyon kun nagdiretso an mga ini sa saindang mga harong.
Afuera suboot sa mga pag-uuran an padifisilan man sa saindang monitoring an namamatean nindang serye nin brownout.
Segun pa sa opisyal na nag-abiso na man sinda sa mga motorista na magluway-luway sa pagpapadalagan kan saindang mga behikulo huli sa pagigin mahalnas an ibang parte kan mga kakasaldahan ngonian na tag-uran.
Sa ibong kaini an mantinidong normal an mga byahe kan mga barko sa saindang pantalan huli ta wara pa man na ipigpaluwas an mga otoridad na pagkansela kan mga byahe kaini.
sa kagayunan suboot an wara pang naiirehistrong pagbaha asin pagrasay nin daga mantang nagtetenir man sa normal an lebel kan mga salog sa saindang banwaan maski magdamlagan an pag-uuran sa mga nakalihis na oras.
Pagirumdom ni Ordoña sa publiko na kun bako man importante an dudumanon an mas maray na magtenir na sana sa sain dang harong mantang dae suboot mataranta magpasiring sa saindang pantalan huli ta bako man suspendido an byahe kan mga barko.
