Nagluwas sa datos kan Commission on Elections na nangenot si Senadora Camille Villar na may pinakadakulang nagastos sa kampanya para sa nakaaging 2025 Midterm Elections.
Sa isinapublikong mga Statement of Contributions and Expenditures kan COMELEC, nag-abot sa P179.6 milyon an nagastos ni Villar sa pangangampanya.
Sinundan siya ni Senador Lito Lapid na naggastos nin P163.5 milyon, asin ni Senadora Pia Cayetano na may P162 milyon.
Kaiba man sa mga may halangkaw na nagastos sinda Senadora Imee Marcos na nag-report nin P139.2 milyon, asin si Senador Ronald “Bato” Dela Rosa na may P128.7 milyon.
Si Senador Bong Go man an nagdeklara nin P127.3 milyon sa saiyang campaign spending.
Susog sa poll body, pwedesir mahiling kan publiko an mga na-scan na kopya kan SOCE sa saindang opisyal na website.
Sa presente, na-upload na an mga dokumento gikan sa 60 senatorial candidates, 29 political parties, asin 141 party-lists.
Magigiromdomang naglansar man an COMELEC kan saindang online platform para sa pagsumiter nin SOCE, na magagamit na sa napaparaning Bangsamoro Parliamentary Elections sa Oktubre.
Obheto kan sistemang ini na pahalangkawon an transparency asin accessibility para sa publiko.
