Legazpi City- Pig-iinganyar kan Albay Electric Cooperative an mga konsumedores kan ahensya na makisumaro sa isasagibong Annual General Membership Assembly na mangyayaring sa maabot na July 5, 2025 sa Albay Astrodome.
Sa intrevista kan Bombo Radyo Legazpi kay Candy Apostol, an Chief Member Services Division kan Albay Electric Cooperative Inc. , sa aktibidad pinaglalaoman an paglatag nin duwang importanteng obheto sa mga programa, enot ay an pagkolectar nin dugang ₱10.00 sa monthly buffer stock fund hale sa saindang member-consumer-owners (MCOs) asin an pagtaas nin total monthly collection hale sa dating ₱10.00 an magiging ₱20.00 na.
Segun sa opisyal an proposal an aprubado na kan ALECO Board of Directors sa paagi kan Board Resolution No. 67, Series of 2025. Alagad an implementation kan proposal an nangangaipuhan pa man na madangog an lado kan mga MCO’s o member- consumer- owners sa gigibuhon na AGMA asin an pinal man na approval hale sa Energy Regulatory Commission (ERC).
Dugang pa ni Apostol na an buffer stock fund na ini an bilang parte kan Disaster Resiliency Program kan Ahensya para sa pag-asigurar kan pagiging abilable kan mga materyales asin mga ekipahe enkasong magkaigwa nin mga kalamidad sa probinsya asin maapektaran an suplay kan kuryente ay tulos man na maibabalik sa paagi kan tulos na pagsasagibo nin restoration sa mga power lines na nadanyaran kan mga maaging kalamidad.
An AGMA ay sarong pagtitiripon tipon kan mga member-consumer- owners kan lambang mga electric cooperative na obhetong mapag-urunan an nagkapirang sitwasyon sa kooperatiba.
Mientras tanto naunambitan man ni Anj Galero, an tagapagtaram kan Albay Electric Cooperative Inc., na limitado sa mga lihitimong miyembro sana an pwedeng maatindir sa naunambitang akitibidad asin para sa mga maatindir sa aktibidad ay igwa man sindang pinagpreparar na mga pakonswelo sa paagi kan raffle draw. MAntang igwa man na mga tiglatag na libreng sakay para sa mga maatindir sa AGMA 2025.
