Pigbareta kan civil defense agency kan Gaza na 46 katawo an nagadan mantang naghahalat nin tabang sa tahaw kan padagos na Israel sa Palestinian territory.
Segun sa tagapagtaram kan ahensya na si Mahmud Bassal, 21 an nagadan asin poco mas o menos 150 an nairido sa sarong insidente nin pambabadil sa central Gaza, mantang 25 pa an nagadan sa suway na insidente sa southern Gaza.
Tinuyaw man kan mga human rights group asin kan United Nations an sistema kan pagbabarewas kan pagkaon na pigsusuportaran kan US asin Israel sa Gaza, na pinalitan an mga ahensiyang UN sa pamumudmod kan ayuda.
Segun kay Thameen Al-Kheetan, tagapagtaram kan UN human rights office, an paggamit sa pagkaon bilang armas laban sa mga sibilyan an maikokonsidera na war crime.
Poon pa kan katapusan kan Mayo, ipigbareta kan health ministry kan Gaza na dae mababa sa 516 katawo an nagadan asin haros 3,800 an nairido mantang pigpoporbarang magkuwa nin rasyon.
Lalong pigpalala kan kagutuman asin kakulangan sa ayuda an kalmugtakan kan labi duwang milyong residente kan Gaza, segun sa mga human rights groups.
Mientrastanto, kasabay kan ceasefire sa pagultangan kan Israel asin Iran, nangapodan man an mga kaanak kan mga bihag asin mga lider kan oposisyon sa Israel na ibale na man an Gaza sa tigil-putukan.
Segun kay opposition leader Yair Lapid, panahon na nganing ibalik an mga bihag asin wakasan an digmaan.
