LEGAZPI CITY – Nagtao nin posibilidad an sarong aircraft expert sa mga nagin kawsa kan pagbagsak kan Boeing 787-8 Dreamliner sa India.
Magigirumduman na an Boeing 787-8 Dreamliner, Air India flight AI171, an buminagsak pirang segundo makalihis mag-take-off, harani sa kaharongan kan Meghani Nagar, na buminagsak sa sarong medical school.
Segun ki Denmark Suede sa intrevista kan Bombo Radyo Legazpi na dakulon na pwedesir magin rason kan pagbagsak kan nasabing eroplano.
Hanggat dae pa naipapaluwas an official report na nakuwa sa blackbox kaini an dae pa maaraman an eksaktong nangyari digdi.
Kun siya suboot an hahaputon, pwedesir na salang switch an napindot kan saro sa mga piloto kan eroplano sa pag-take off kaini kun kaya ini buminagsak o nagkaproblema sa fuel valve kan eroplano.
Pigtaram pa kaini na sa flight data recorder asin tactic voice recorder maaaraman an tunay na rason kan nangyaring insidente.
Bilang sarong eksperto sa mga behikulong panghimpapawid, nasabotan niya an ikinawsang takot sa publiko sa pagsakay sa mga eroplano.
Alagad kun siya an hahaputon, matibay an design Boeing 787-8 huli ta sarong bes pa sana ining nagkaigwa o naimbwelto sa pag-crash.
Sa ibong kaini an nanindugan si Suede na mas safe pa man giraray na sakayan an eroplano kompara sa iba pang behikulo.
