LEGAZPI CITY – Unti-unting nang bumabalik sa normal ang byahe ng mga cargo truck sa ilang pantalan sa rehiyon ng Bicol.
Ito ay kasunod ng nairehistrong pagdagsa ng mga cargo truck noong mga nakaraang buwan sa mga daungan ng Matnog, Pio Duran at iba pa dahil sa epekto ng pansamantalang hindi pagpapadaan sa San Juanico Bridge.
Ayon kay Port Management Office Bicol Media Relations Officer Achilles Galindes sa panayam ng Bombo Radyo Legazpi, naglabas sila ng dalawang karagdagang ruta kung saan mayroon itong biyaheng Sorsogon papuntang Palumpong, Leyte at vice versa habang ang isa naman ay may rutang Sorsogon papuntang Surigao at vice versa.
Layunin ng mga karagdagang rutang ito na matugunan ang mga apektadong byahe patungo sa Visayas at Mindanao matapos ang pagsasara ng tulay na nag-uugnay sa Samar at Leyte.
Gayunman, nilinaw niya na ang dalawang ruta ay eksklusibo sa mga cargo truck na may mga dalang produkto na hindi makatawid sa tulay para makahanap sila ng alternatibong ruta.
Sinabi ng opisyal na hindi na bago sa mga pantalan sa Bulan, Sorsogon ang mga karagdagang biyahe dahil maraming barko ang naglalayag ngunit tinitingnan din nila ang kapasidad ng pantalan kung sakaling sumugod muli ang mga pasahero.
Bukod sa Bulan port, nagdagdag din sila ng ruta sa Matnog port para matugunan ang pagdami ng mga cargo truck na apektado ng rehabilitasyon ng tulay.
Hinimok ni Galindes ang mga naghahanap ng alternatibong ruta na manatiling nakatutok sa kanilang mga social media sites para sa karagdagang mga flight papuntang Visayas at vice versa.
