Kinumpirmar kan mga otoridad an pagkaka-recover nin kadugangang sako kan pigtutubudang shabu sa katubigan kan Pangasinan asin Ilocos Sur poon Hunyo 5 hasta Hunyo 7, 2025.
Sa kasuguan ni Presidente Ferdinand Marcos Jr., nagtatabangan an Philippine Coast Guard (PCG), Philippine Drug Enforcement Agency (PDEA), Philippine National Police (PNP), asin iba pang ahensya nganing masolusyonan an kaso asin mamantenir an seguridad sa mga maritime zone kan nacion.
Magigirumduman na kan Hunyo 5, 2025, pitong sako kan pigtutubudang shabu an isinuko kan mga parasisira makalihis ining madukayang palutang-lutang sa baybayon kan Pangasinan.
Kan Hunyo 6 asin 7, 2025, naka-recover pa an pinagsarong pwersa kan gobierno nin mga sako kan ilegal na droga sa padagos na pagpapatrolya sa dagat.
Duwang parasisira hale sa Sta. Cruz, Ilocos Sur an nag-turn over nin duwang sako na may parehong klase nin packaging arug kan nadukayan sa Pangasinan, na nagpapahiwatig nin posibleng pag-anod kan mga ilegal na droga pasiring sa hilaga.
Inomaw man ni Captain Mark Larsen Mariano an katapatan asin pagigin mapagmasid kan mga parasisira, na nagtabang nganing mapigulan an paglakop kan bilyong pisong kantidad kan illegal na droga sa mga komunidad.
