Kampo ni Arnie Teves, nilinaw na warang special treatment sa dating lehislador mantang nakakarsel sa Bilibid

Nilinaw kan kampo ni dating Negros Oriental Congressman Arnolfo “Arnie” Teves Jr. na warang special treatment sa dating lehislador mantang nakakarsel sa New Bilibid Prison sa Muntinlupa City.

Segun sa legal counsel ni Teves na si Atty. Ferdinand Topacio, nagtugot sindang magtalima sa gabos na regulasyon para sa mga preso kaiba an pagshi-share kan kulungan ni Teves sa ibang preso.

Ini ngani maibitaran an ano man na posibleng pagtuyaw laban ki National Bureau of Investigation (NBI) Director Jaime Santiago na nanenot nang sinabi na ikukulong paramientras si Teves nin solo sa Building 14 kan Bilibid.

Segun pa ki Atty. Topacio, siring kan ibang presuhan, makakaiba ni Teves an iba pang inmate sa sarong 10 square meter cell na may bunk bed, sarong toilet asin sadit na electric fan.

Magigiromdomang dagos nang napa-deport si Teves sa Pilipinas makalihis maarestar kan mga otoridad sa Timor-Leste kun saen naghagad ini nin asylum.

Dinara si Teves sa NBI headquarters kun saen nagsairarom ini sa booking procedure asin medical examination.

Kun saen inilipat na man ini sa Building 14 kan Bilibid.

Magigiromdomang patung-patong na kaso an pigkahampang ni Teves sa Pilipinas kaiba na an Pamplona massacre kun saen siya an pigtutukdong utak sa paggadan ki Negros Oriental Governor Roel Degamo asin 9 na iba pa.