LEGAZPI CITY – Pighayag kan Legazpi City Police Station an generally peaceful na assessment katakod kan kakatapos pa sanang semana santa.
Sa ibong kaini an ipigheras ni Legazpi City Police Station spokesperson Police Executive Master Sergeant Carlos Paña sa intrevista kan Bombo Radyo Legazpi na may nairehistrong duwang vehicular accident na ikinagadan kan mga drayber.
Napag-araman man na hale sa urugmahan asin nasa impluwensya nin arak an mga driver antes mangyari an mga insidente na kina-imbweltuhan ninda.
Wara man na nairehistrong nalamos sa mga kadagatan huli na man sa pakikipagtabangan kan kapulisan sa Bureau of Fire Protection asin iba pang law enforcement agencies.
Nahiling man kan opisyal an nagin gabat kan trapiko sa mga kakalsadahan kan Legazpi City partikulamente na kan Miyerkules Santo asin Sabado De Gloria.
Mawot man ninda na madugangan sa mga masunod na semana santa an saindang mga personel na nakadeploy sa mga simbahan asin pasyaran sa manlain-laing parte kan ciudad.
Matrangkilo man an bulos kan mga pasahero sa mga terminal asin piglalaoman ninda na mabaralik sa saindang mga trabaho an mga turista asin bisita hasta ngonian na aldaw.
Dakulang pasalamat ni Paña sa publiko partikular na mga nagsunod kan saindang pagirumdom mapadapit sa saindang mga kaharongan kun kaya wara sindang nairehistrong insidente nin panghahabon sa eneterong durasyon kan Semana Santa.
