Guminadan nin 12 indibiwal an inilansar na airstrikes kan Amerika sa kabisera kan Yemen.
Irido man an 30 iba pang indibidwal, susog sa Houthi rebels.
Nagsayuma man an US military na Central Command na magkomento katakod sa nasambitang pag-atake asin kun may sibilyang nadamay sa insidente.
Susog sa Houthi rebels, tinamaan an sarong famuso na market sa Farwa district sa kabisera kan Sana’a. An nasambit na lugar an tinarget na kaito kan Americans.
Sa footage na ipinaluwas, mahihiling an destroso sa mga lunadan asin mga edipisyo sa lugar.
Tinamaan man sa magdamlag na strikes an iba pang lugar sa Yemen, kairiba an Amran, Hodeida, Marib asin Saada governorates.
An nasambitang pag-atake an nangyari sa tahaw kan pinahigot pang kampanya kan Estados Unidos na maglansar nin strikes target an rebeldeng grupo huli sa pagpuntirya kan mga ini sa mga barkong nag-aagi sa Red Sea.
Ginibo man kan US an pag-atake makalihis magtama an airstrikes sa Ras Isa fuel port sa Yemen kan nakaaging semana na guminadan sa 74 indibiwal asin nairido an 171 iba pa.
