LEGAZPI CITY – Pighayag kan Task Force Kalinigan at Kaayusan na 100 percent na sindang preparado nganing magtaong asistensya sa semana santa na mapoon na saaga, Abril 13.
Segun ki Task Force Kalinigan at Kaayusan Head Mark Andy Marbella sa intrevista kan Bombo Radyo Legazpi na preparado na para sa palm sunday saaga an saindang team kairiba an mga manlain-laing law enforcement sa ciudad nin Legazpi.
Sa lunes santo an magpapatrolya man sinda sa mga kakalsadahan nganing pagirumduman an mga naka illegal park partikulamente sa mga aagihan kan prusisyon.
Magsasagibo man sinda nin road closure sa mga nagkapirang tinampo nganing wararang ulang sa mga gigibuhon na prusisyon kan mga deboto asin hahalion pagkatapos.
Paglinaw kaini na sarong bes man sana sa kada taon nangyayari an holy week kun kaya sabuton na sana kan mga driver asin komyuter an magigin gabat kan trapiko sa mga masunod na aldaw.
Sunudon na sana suboot an ipigbugtak na ordinansa kan lokal na gobierno nganing malikayan an pagkakahampang sa penalidad.
Pig-aantisiparan na man ninda an pagdakol kan basura na makokolekta kun kaya naka-standby nang mga street sweepers nganing maibitaran na an pagkatambak kaini sa mga tinampo asin simbahan.
Pangapodan ni Marbella sa mga nagtitienda nin palaspas sa bisinidad kan mga simbahan na dae pag-ulangon an agihan asin dae ipagwalat an mga basura nganing makabwelo man an mga panata ngonian na domingo de ramos.
