LEGAZPI CITY—Sarong Luzon king cobra an luminaog sa sarong harong sa Barangay Salvacion, Panganiban, Catanduanes.
Segun ki Catanduanes Biodiversity Core member Feliciano Avila De Leon, sa intrevista kan Bombo Radyo Legazpi, na may naresibi sindang report gikan sa sarong concerned citizen na may nahiling sindang king cobra sa laog mismo kan sarong harong sa nasambit na lugar.
Pigkarkulo na maabot soboot sa anom (6) na kilo an gabat kan halas asin may labang nin lagpas na tolong (3) metro.
Nangyari soboot ini makalihis an daeng patod na pagbatok nin ayam sa irarom kan lamesa mantang sinda nagtitiripon.
Kun kaya digdi na sinda nagngalas na kun saen nahiling na kan sarong apo kan lola na kairiba sa harong an naunambitang halas.
Huli na man sa pagkatakot, ginadan an nasambitang hayop.
Dugang ni De Leon, na posibleng naghahanap an halas nin ligtas na lugar o kaya may temperatura ining paghahanap kun kaya posibleng sa naunambitang harong ini nagtenir.
May nahiling man soboot na hirarom na luho sa laog kan harong na sarong posibleng rason na may kairiba pa ini o kaya digdi nagbobonay.
Sinabi kaya kan opisyal na hanggang bulan nin Abril an breeding season kan mga halas.
An Luzon king cobra saro sa pigkonsiderar na most deadliest and venomous snake sa bilog na kinaban, asin saro ining endemic species o sa Luzon sana ini mahihiling.
