LEGAZPI CITY – Nagpapadagos an ipigsasagibong mass contract signing kan National Irrigation Administration Albay para sa ammended irrigation subsidy sa provincia.
Segun ki National Irrigation Albay Provincial Office Operation Section Chief Bernadeth Balingasan sa intrevista kan Bombo Radyo Legazpi na kaipuhan kan mga irrigations associations na magpirma kan kontrata nganing matawan an mga ini nin operation maintenance subsidy.
Nagpirma na man sa kontrata an labi 60 irrigations associations sa bilog na provincia nganing matawan nin subsidiya an mga ini para sa dry season asin sa sunod na anihan.
Depende man suboot sa saindang ektaryang napapatubigan an saindang mareresibi na kantidad na pwedesir kan mga ini magamit sa pagpapakarhay kan mga pasilidad kan saindang irigasyon.
Pigtaram pa kan opisyal na may target kuta sindang 500 hectars na contract farming sa provincia alagad nagkaproblema suboot an iba sa mga ini huli sa epekto kan shearline kan mga nakaaging bulan.
Padagos man an konstruksyon kan ibang mga solar water pump nganing makatabang na man sa mga paraooma enkaso maglala pa an init kan panahon asin paglaog kan dry season.
Nakikipagtabangan na man sinda sa mga Gobierno Lokal asin mga ahensya kan gobierno nganing matabangan an mga irrigation facility na na-apektaran kan mga nakaaging raot kan panahon.
Pagirumdom ni Balingasan sa mga nagpirma kan kontrata na mag-comply kan mga rekisitos nganing makakuwa man giraray an mga ini kan subsidy kan saindang ahensya.
