LEGAZPI CITY – Bako nagin madali an pinag-agihan kan Top 1 sa September 2018 Registered Electrical Engineers exam antes magkamit kan dae man piglalaoman na trayumpo.

Ipigheras ni Niño Boy Armario Dacer, tubong Guinobatan, Albay sa ekslusibong intrevista kan Bombo Radyo Legazpi na labing ikinabigla an pangengenot sa exam rating na 93.05% urog na makapasa sana an ipinangadyi.

Inako man kaining makapirang beses na man nanluya asin naghibi puon kan pagkaaki kan mapag-araman na elementarya pa sana kan iwalat na siya asin tulo pang tugang kan sadiring ama.

Siring man kan ibang jovenes, kaitong kolehiyo kan magbalo man sa pagkamoot alagad nagpalyar makalihis na dae akuon kan namomotang babaye an pigtatangrong relasyon.

Sa ibong kan mga ini, solamenteng pangadyi sa Kagurangnan asin kumpiyansa kan pamilya asin mga amigo an nagsirbeng kusog tangarig magtrayumpo sa mga agyat mantang inakong bukas man giraray na makahampang an ama makalihis an haloy na dae paghihilingan.

Mientras tanto, nakatalaan man ining magbalik sa Albay sa Setyembre 10 si Dacer tangarig na makaibanan an pamilya makalihis na magreview sa Cebu para sa exam.

Sa ibong na lado, laog man sa Top 10 an mga Bicolanong sinda Cedie Orain sa ikalimang pwesto (90.80); Mhenbert Manalo Baranda sa ikasampulo (89.9); asin Mark Joseph Cerila sa ikawalong pwesto (90.25).